Маай, Үлэ, Саас бырааһынньыгар аналлаах «Саас кэллэ, үлэ-хамнас күөстүү оргуйдун!» Холбоһуктаах кэнсиэрбит бэрт ситиһиилээхтик буолан ааста бөһүөлэкпит олохтоохторо- кырачааннартан аҕам саастаахтарга тиийэ- бары бииргэ түмсэн кэлбит сааһы уруйдаан, үлэни айхаллаан улахан концерт туруордубут. Кырачааннарбыт чыычаах курдук ыллаан чуопчаардылар. Имигэс үҥкүүлэринэн манньыттылар. Оскуола саастаах оҕолорбут хоһоон ааҕан, ырыа ыллаан , үҥкүүлээн барыбытын үөртүлэр. Эдэр ыччат ылбаҕай ырыатынан, сонун сэргэх үҥкүүлэринэн биир дойдулаахтарын эҕэрдэлээтилэр. Аҕам саастаах ырыаһыттарбыт толоруулара сүргэни көтөхтө, көрдөөх нардаах артыыстарбыт көрүдьүөс сценкалары туруоран, күллэртээн көрөөччүлэри сэргэхситтилэр. Айымньылаахтык үлэлииргэ-хамсыырга күүһү-энергияны биэрдэ. Чахчы да маннык сэргэх тэрээһин кэннэ үлэ күөстүү оргуйуо, күөх саас көхтөөхтүк кэлиэ. Күөххэ үктэннибит, үлэ күөстүү оргуйар кэмигэр дьоммут-сэргэбит бииргэ мустан, үөрүүбүтүн үллэстибиппит харахха хатанна. Кыттыыны ылбыт артыыстарбытыгар уонна кэлэн өйөөбүт бары көрөөччүлэрбитигэр дириҥ махталбытын тиэрдэбит! Куруук маннык түмсүүлээх буолуоҕун. Өссө төгүл Саас, Үлэ уонна Маай бырааһынньыгынан эҕэрдэлиибит! П.П.Местников аатынан «Алгыс» культурнай спортивнай киин.
